أخبار سريعة
الرئيسية / أخبار سريعة / حقيقة 600 مليار جبل الحلال

حقيقة 600 مليار جبل الحلال

الجسر-احمد محسن-حق مسيحي العريش فين ؟26022017--1

 

 

احمد محسن .
الجسر-احمد محسن-حقيقة 600 مليار جبل الحلال02032017--1حقيقة 600 مليار جبل الحلال ..
للي لسه صاحي من النوم وميعرفش حاجة .. نقوله ألف مليون مبروك الـ 600 مليار دولار .. واللي الحمد لله لقيناهم في جبل الحلال .. وخلاص افرحوا وزقططوا.. وقربت تروق وتحلى .. والعيشة هترتاح .. وهنرحرح آخر رحرحة ..
الخبر جميل الصراحة .. والرقم جديد ومبهر .. أما مصدره الاصلي جريدة مغمورة اسمها ( نبض الشارع ) .. وقالت بكل فشخرة ان قواتنا البواسل نجحت في السيطرة الكاملة على ( جبل الحلال ) .. وكمان الكل يهيص عشان لقينا مضبوطات تقدر قيمتها بـ 600 مليار دولار ..
مصدر الخبر : http://bit.ly/2mwd97D
الفلوس دي متوزعة ما بين تماثيل اثرية .. ومجوهرات تاريخية بعمر الاف السنين .. وخدو المفاجئة اللي مش هتستحملوها من الفرحة .. خلاص لقوا (( مخبأ أموال الاخوان السري )) .. واللي فيه فلوس لا حصر لها .. وقالت الجريدة ان جنودنا المخلصين اودعوا كل الأموال بالبنك المركزي إمبارح ..
( الاف الشير للخبر عالفيس بوك بالبحث عن جملة 600 مليار او جبل الحلال )
الناس اللي شيرت الخبر محدش يقدر يلومهم لأن مفيهمش حد كلف نفسه وبحث عن المصدر .. معظم المصريين على اختلاف انتمائاتهم نفسهم الخير يعم .. وينتشل بقى مصر من الوضع العسل اللي بقت فيه ..
لكن المفاجئة ان الخبر الأصلي للمضبوطات مش هو ده ولا بالرقم ده .. التصريح الاول لحكاية المضبوطات جه على لسان مسئول وهو عضو مجلس الشعب / علاء عابد .. رئيس لجنة حقوق الانسان .. واللي قال ان قوات الجيش والشرطة لقت ( ملايين الدولارات !! ) اثناء مداهمة ( جبل الحلال ) ..
طيب .. ملايين ملايين .. أهي أي حاجة والسلام ..
ايه بقى الكلام الحقيقي ؟
بالرغم ان الصحف المصرية الاصيلة .. ومعاها كامل وسائل الاعلام التابعة للدولة بتغني من اول امبارح عن ( السيطرة الكاملة على جبل الحلال ) وانهم لقوا مضبوطات .. ومنها ( كروت عملاء اجانب ) ده غير العملاء اللي لقوهم نفسهم .. الا ان الحقيقة ان ده كل في الهجايص ومجرد اشاعات ..
أما الكلام الرسمي كان على لسان المتحدث العسكري .. وهي انهم قبضوا على عدد 2 عنصر تكفيري شديدي الخطورة .. زي ما قال .. وتدمير 12 عشة خاصة بيهم .. ايوه هو قال ( عشة ) متركزوش .. ومعاهم كام مخزن سلاح .. ده غيرعربيات الدفع الرباعي اللي تم قصفها بالطيران ..
المصدر بالصفحة الرسمية : http://bit.ly/2mw8XVI
وبالرغم ان المنطقة دي اسمها المنطقة ( جـ ) حسب اتفاقية ( كامب ديفيد ) .. ودي منطقة منزوعة السلاح الثقيل تماما .. ومبيدخلهاش لا دبابات ولا طيارات .. فقط المصرح له وحدات امنية من الداخلية .. بس نتمنى ان الجيش المصري يكون بيعرف يتجاوز الموضوع ده ..
جريدة الاهرام : http://bit.ly/2lZ5rzL
طيب ايه بقى قصة ( جبل الحلال ) بالمختصر المفيد .. وبعيدا عن فزاعة الاعلام وهبله .. ببحث صغير على جوجل بس بتاريخ قديم .. وباللذات قبل 2011 .. هنلاقي ان ( جبل الحلال ) هو منطقة سلاسل جبلية في سينا تحت العريش بـ 60 كيلو .. وبتمتد بمساحة 60 كيلو برضه من قناة السويس جنوبا .. ولحد فين ؟.. ايوه لحد قلب صحراء النقب في اسرائيل نفسها .. وبمساحة قد ( دولة البحرين ) مرة ونص ..
جريدة العربية : http://bit.ly/2lZ7TX0
السلسلة الجبلية دي شديدة الوعورة .. وفيه ابحاث جيولوجية صنفتها بمستوى اعلى من وعورة جبال ( تورا بورا ) في افغانستان .. واللي كان مستخبي فيها عناصر القاعدة نفسهم .. ده غير ان فيها عدد لا يحصى من الوديان والكهوف اللي بتعتبر ملاذ آمن لأي حد عايز يهرب من تصوير الأقمار الصناعية .. أو حتى رصد الطائرات الهليكوبتر بمختلف اشكالها وانواعها .. لان فيه بعض الكهوف داخل في الجبل لعمق 300 م ..
جريدة المصري اليوم : http://bit.ly/2lZ7S5F
جبل الحلال مر بتاريخه المعاصر بخمس مراحل شديدة الخطورة ..
أول مرحلة هي فترة حرب الاستنزاف ايام عبد الناصر .. لما قوات الصاعقة المصرية كانت واخداه ( مقر عمليات ضد اسرائيل ) .. الفترة دي اسست للفترة اللي بعدها بكل سهولة وهي فترة ( اكبر سوق سلاح ومخدرات في مصر ) .. يعني تجميعه من بقايا السلاح الموجود من فترة الحرب ..
بالاضافة لتهريب السلاح من اسرائيل .. وشوية اراضي مزروعة بانجو وحشيش .. وده لان الحدود بالكامل كان عليها 700 عسكري مصري .. والجانب الاسرائيلي كان البدو بيرشوه عادي .. وكمان صحراء النقب اساسا امتداد جغرافي طبيعي لبدو سيناء .. ولازالت منطقة صحراء النقب في اسرائيل سكانها عرب بدو ..
جريدة الوطن : http://bit.ly/2lZlwpn
بعد كده دخلت عالخط ( الجماعات الجهادية ) واللي نفذت في 2004 و 2005 انفجارات شرم الشيخ المشهورة .. واللي نظام مبارك عمل حملة على ( جماعة التوحيد والجهاد ) وقتها بقوام 3500 جندي وضابط .. لكن لما اتقتل اللواء / محمود عادل .. وكمان المقدم / محمد غريب .. ومعاهم عشرات المجندين بفعل الالغام اللي كانت ولا زالت زارعينها التكفيريين في المكان .. فتم ايقاف الحملات الامنية ..
جريدة الشرق الاوسط : http://bit.ly/2lZcE2J
المرحلة اللي بعد كده هي مرحلة ( الهاربين من الاحكام ) ..ودول اللي هربوا في احداث فتح السجون في ثورة يناير 2011 .. وبقى ( جبل الحلال ) معلم لمطاريد مصر .. وفيه ناس هناك عليهم احكام وصلت لـ 125 سنة .. وراحت قابلتهم ( المصري اليوم ) في 2012 بلقاء حصري .. ومن ساعتها بتتنافس صحف كتير انها تروح هناك ويسمعوا من المحكوم عليهم سواء ظلم ولا عدل ..
لقاء المصري اليوم : http://bit.ly/2lZ95ty
لقاء مصراوي : http://bit.ly/2lZl8ab
لقاء الاهرام : http://bit.ly/2lZfB3t
الغريب في كل القصص دي .. ان المحكوم عليهم اتفقوا على حاجة واحدة .. وهي ان ( امناء الشرطة هي اللي فتحت السجون ) .. ولا كان فيه ارهابيين ولا دياولوا !! .. المهم وما علينا .. بعد كده دخلت مرحلة ( داعش ) بكل تقلها في المنطقة دي .. وبرغم ان الاهالي هناك مش طايقينهم لانهم بيتقصفوا معاهم .. لكن الدولة مبتقدمش أي دعم للاهالي من أي اتجاه .. ولا بتسمع لحد فيهم .. وبتعتبر ان هم وداعش سواء ..
جريدة مصراوي : http://bit.ly/2lZl8ab
ابتدت المداهمات الامنية الحقيقية في اواخر 2011 وابتدوا ( العملية نسر ) .. ولما مسك السيسي وزير دفاع طلع حملة بقوام 5000 جندي .. ومن ساعتها الى الان فيه عشرتلاف تصريح بانه تم التحكم الكامل في منطقة جبل الحلال من 2012 حتى يومنا هذا .. وطبعا كله كلام خرف .. لان اخر احصائية لتعداد سكان المساحة الكبيرة دي هي 12 الف شخص .. وكل اللي اتمسك او اتقتل هم عشرات يتعدوا عالصوابع ..
احصائيات كاملة ويكيبيديا : http://bit.ly/2lZ6Ki9
نرجع لسؤالنا اللولبي مرة تانية ؟ .. هل الدولة لقت كنز في جبل الحلال ؟ .. والاجابة .. ايوه طبعا لقت .. جبل الحلال هو كنز استراتيجي .. كنز لأنه بيعتبر الشماعة الكبرى للفشل الامني في سيناء .. وده من ايام مبارك لحد السيسي .. عشان العناصر التكفيرية لازالت رايحين جايين بطول سيناء وعرضها .. ومش جبل الحلال بس .. فالنظام واتباعه هيقعدوا يهروا في اسطورة جبل الحلال واللي بيلاقوه فيه .. بس من الاخر هي اعادة لقصة ( فيلم الهروب ) لأحمد ذكي .

تعليق واحد

  1. تسلم يا باشمهندس
    اُسلوب سلس ومعلومات بمصادرها كالعادة
    بس انا بحثت في صفحتك على البوست ده ومالقتوش الا هنا

إلى الأعلى