أخبار سريعة
الرئيسية / أخبار سريعة / علشان الحب يعيش

علشان الحب يعيش

الجسر-دعاء راجح-بنات اليوم07092017--1

 

 

دعاء راجح .
الجسر-دعاء راجح-دعاء راجح-علشان الحب يعيش12102017--1علشان الحب يعيش .
قالت : انا بحب جوزى اوى و هو كمان بيحبنى
و عندى قلق دايما ان الحب دا ممكن ينهار فى اى وقت من كتر ما بسمع
ازاى اقدر احافظ على الحب بيننا ؟
للاسف مفيش حاجة اسمها وصفة سحرية للحفاظ على الحب تنفع لكل الناس
مفيش معادلة ثابتة او قانون ثابت يصلح لكل العلاقات
بالرغم من التطور المذهل فى علوم النفس و الاعصاب و بالرغم من انهم اكتشفوا كيماويات الحب الى بتطلع من المخ عند المحبين و عرفوا بتطلع منين و بتعمل ايه
بس لسة لم يكتشفوا عقار يوجد الحب داخل القلوب و يخليه يستمر
بس انا من تجربتى الشخصية
و من مشاهداتى للمتزوجين المحبين الى استمر حبهم مدد طويلة
اكتر حاجة بتحافظ على الحب هو محاربة الانانية داخل نفسك و تنمية قدرتك على العطاء
استمرار الحب قرار
قرار ان اعطى و اكون مسئول عن طمأنة و راحة و سعادة هذا الانسان
و الى بيخلى الحب يستمر ان يكون هذا التوجه من الطرفين
لانه لو من طرف واحد غالبا لايستمر
و بدل ما كل واحد فيهم مركز التانى بيعطينى ايه و بيدينى ايه و بستفيد منه بايه
يركز على انا هديه ايه و هسعده ازاى و هريحه و اطمنه ازاى
انه يكون هدف كل واحد انى اشبع احتياجاته النفسية
و اسعى الى ان ينضج ويشبع و كمان يكبر و يحقق طموحاته و احلامه و انا معاه
و يحس بالراحة و هو بيتكلم معايا و الطمأنينة و انا جنبه
الا ينقطع التواصل و ان كل واحد يبقى عنده استعداد يسمع و يشارك التانى و ينفتح هو كمان بالكلام معاه
الرغبة الجنسية ممكن تقل مع الوقت مع السن و التعود و طول الامد
و المشاعر كمان بتهبط اكيد و ممكن يهجم عليها كمان الملل و الرتابة
و العلاقة ممكن تتعرض لصدمات و هزات قوية بلا ادنى شك
لكن الى بيخليها تكمل هو قرارنا بالاستمرار
قرارنا بالصفح و التسامح
قرارنا باننا هنحافظ على العلاقة دى
و لا يعنى كلامى ابدا قرار الاستمرار فى الزواج
فيه ناس بتستمر فى الزواج لكن استمرار تعيس
لكن احنا بنقرر اننا نستمر مع دوام اصلاح مافسد و اعادة العلاقة الى سابق عهدها بعد الازمة
فى العالم الى احنا عايشين فيه
عالم يموج بالمتغيرات السريعة على كل المستويات الاقتصادية و السياسية و الاجتماعية
بتحصل تقلبات فى الحياة
تقلبات سريعة و مشاكل و صدمات و مآسى
الصدمات دى لو اتعاملنا معاها على انها اختبار لهذا الحب هل هيصمد و الا لأ ؟
و اخدناها احنا الاتنين كتحدى هنمسك فيه ايد بعض و نواجهه
هنقدر نعديها
لكن للاسف لو واحد فيهم قرر خلاص انه هيسيب ايد التانى
و مش هيساعده
و يسيبه يواجه مشاكله بنفسه
كدة هنتوه فى الزحمة من بعض
و كل واحد هيعمل عالم موازى يعيش فيه
و هتحصل غربة وهيموت الحب بالتدريج
محتاجين نفضل مع بعض دايما
نتكلم مع بعض دايما
ننفتح على بعض دايما
نتشارك مع بعض دايما
نواجه الحياة و قرفها مع بعض دايما
و كمان نضحك و نتبسط مع بعض دايما
علشان الحب يعيش
محتاج ارادة من الطرفين انهم هيفضلوا حاضرين مع بعض دايما
….

اضف رد

لن يتم نشر البريد الإلكتروني . الحقول المطلوبة مشار لها بـ *

*

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

إلى الأعلى