أخبار سريعة
الرئيسية / أخبار سريعة / غيّر عاداتك السلبية…الغيبة

غيّر عاداتك السلبية…الغيبة

الجسر-دعاء راجح-زعل المحبوب15102017--2

 

 

د.دعاء راجح
الجسر-دعاء راجح-غيّر عاداتك السلبية12062018--1غيّر عاداتك السلبية :
الغيبة
ساعات بتكون أغلب معاناتنا فى حياتنا نابعة من طبايع و عادات احنا اتعودنا عليها للاسف الشديد
و بتكون انت نفسك مصدر السلبية الى فى حياتك
و خاصة عادات الكلام
او مايطلق عليها آفات اللسان
لان دى حاجة بتؤذى الآخرين مؤكد
و تخليهم سلبيين تجاهك بلا ادنى شك
و لان لو عندك لسة ضمير حى بتخليك تحس بالذنب
و يمكن الاحساس بالخزى
و انك مكسوف من نفسك انك قلت كدة او انك آذيت حد
من العادات المنتشرة اوى فى مجتمعاتنا ( الكلام عن الناس ) او (الغيبة)
و للاسف أغلب تسالى الناس و تواصلهم انهم قاعدين بيتكلموا على بعض
شوف كدة قعدتك مع اصحابك او اخواتك او امك
او حتى تواصلكم على وسائل التواصل
هتلاقوا نفسكم بتتكلموا على حد
و بتذكروا عيوبهم و غلطاتهم و نقائصهم و الوحش الى فيهم و تسخروا منهم
مش هتكلم من الناحية الدينية لانها معروفة و مشهورة
هتكلم من الناحية النفسية
الكلام على الناس فى غيبتهم دى تعتبر عدوانية مدفونة
نفوس غير سوية عندها غل أو غضب أو حقد أو غيره أو حسد بتطلعه انها تطعن الانسان دا فى ظهره …و تتكلم عليه فى غيابه
و ساعات بتكون رغبة فى لفت انتباه الاخرين للحكايات الى انت بتحكيها
بتتبسط ان عندك حواديت بتلفت النظر ليك و تخلى الناس تسمعك و تتفاعل معاك بالتساؤل و الفضول و الرغبة فى معرفة التفاصيل
و الغريب و العجيب ان نفس ذات الانسان الى غاوى يجيب فى سيرة الناس هو نفسه الى طول النهار يشتكى من ان الناس بتتكلم عليه
و الطعنات الى بتيجى فى ظهره من فلان و علان
و مش كدة بس
دا ممكن الشخص الى انت اتكلمت عليه دا يوصله الكلام الى اتقال عليه و تبقى مشكلة
و ممكن الكلام يتحور و يتنقل بشكل اسوأ انت ماتقصدوش اصلا
و الا ممكن حد يشوف الى انت كتبته عنه و ينقل له الى اتقال
و تلاقى أغلب مشاكلك مع الناس بسبب الى انت قلته و اتنقل على لسانك
عادات للاسف اتعودنا عليها
و وصلت اننا معدناش بنحس اننا بنعمل كدة اصلا
و تلاقينا بنؤذى اقرب الناس لينا و احنا مش حاسين
و اكتر حد بنتكلم عنه فى ظهره هو اقرب الناس لينا
هو اباءنا و امهاتنا
او ازواجنا و اولادنا للاسف الشديد
و بعدين نزعل من سلبيتهم
ماهو اكيد مؤكد بالتأكيد المعصية ( الغيبة ) دى ليها عقوبة
و ساعات العقوبة بتكون ان ربنا يقلب قلبه عليك و يحس انه مش طايقك حتى لو ماعرفش انت بتقول عليه ايه
ساعات ما يوصلوش الكلام
بس القلوب عند بعضها
و احساسه من جواه بيقول له حاجة من ناحيتك
و ياسلام لما يوصله الكلام و يعرف انت بتقول عليه ايه
زمااان كنت كامرأة احب (قعدات النميمة) دى
و بالرغم انى كنت بسمع بس كان قلبى بلا شك بيتغير ناحية الانسان الى انا بتكلم عليه او بسمع عليه كلام
قررت بعد تجربة مؤلمة انى اتوقف تماما عن هذه العادة السيئة
و عن ذكر اى حد باى حاجة فى غيبته ….
الا لو بطلب المشورة ( لايحب الله الجهر بالسوء من القول الا من ظلم )
و انى اول ما نفسى تحدثنى انى اقول حاجة سيئة
او لو غلطت و قلت حاجة فعلا …اقول وراها حسنات و مواقف حلوة …تصلح الدنيا شوية
يعنى لو غلطت و قلت على زوجى حاجة بقول بس الحمد لله هو كريم و هادىء
لو غلطت وقلت على اولادى حاجة بقول الحمد لله هم مهذبين و جدعان
و لو حد بيكلمنى عن حد و قاعد يقطع فى فروته بذكره برده بحسناته و مواقفه الطيبة التانية
بحاول اوجه عقلى و تفكيرى الى حسنات و افضال و مميزات الاخرين علشان نفسيتى انا تكون صافية ناحيتهم
و صدق الحبيب : (لا يُبَلِّغُنِي أحدٌ من أصحابي عن أحدٍ شيئًا، فإنِّي أحبُّ أن أخرج إليكم وأنا سَلِيم الصَّدر)
طول ما انت مركز على العيوب و النقائص و اخطاء الناس هتلاقى قلبك بيتغير
و قلوب الى حواليك بتتغير
و قلوب الى انت اتكلمت عليهم هتتغير
و الناس مؤكد هيركزوا عليك برده و الى اتكلم على غيرك بسوء هيتكلم عليك
ساعتها بأة ما تلومش الا نفسك
لانك حاطت نفسك فى دايرة السلبية و مبسوط انك جواها و مش راضى تخرج منها
….

التعليقات مغلقة

إلى الأعلى