أخبار سريعة
الرئيسية / أخبار سريعة / أحد أهم أسباب الطلاق الموجودة حاليا هو السوشيال ميديا

أحد أهم أسباب الطلاق الموجودة حاليا هو السوشيال ميديا

الجسر-دعاء راجح-زعل المحبوب15102017--2د.دعاء راجح
أحد أهم أسباب الطلاق الموجودة حاليا هو السوشيال ميديا
السوشيال ميديا بتنقلك طاقة و أفكار سلبية غير طبيعية
لدرجة ان الدراسات الحديثة بتتكلم عن ارتفاع نسب الاكتئاب بشكل مخيف بعد ظهور السوشيال ميديا
وارتفاع نسب الطلاق أيضا
انتى بتقرى مشكلات النساء و تتعاطفى مع الكاتبة
و تحسى بالى هى حاسة بيه تماما
و دى حاجة بتحصل بشكل لا ارادى تماما …
مسئول عنها خلايا عصبية فى مخنا اسمها الخلايا المرايا الى بتعكس اى مشاعر مؤلمة بتشوفها فى محيطك
و تخليك حاسس بيها حتى لو المشكلة مش عندك
كتر الجرعة دى بيزود احساسك بالكآبة العامة و الضغوط بلا ادنى شك
لو بتقرى المشكلة و هى عندك ممكن اوى تكون درجتها أقل بس انفعالك ليها بيكون أزيد
يعنى بتقرى مثلا عن راجل عصبى بيضرب مراته
و بالرغم من ان جوزك عصبى بس عمره ما مد ايده عليكى و لا اهانك
لكن الموضوع دا بيدخل فى قلبك مخاوف و توتر انه ممكن يعملها فى يوم من الايام
و تبدئى تنفعلى كما لو انه ضربك حقيقى و ترفع مستوى التوتر و القلق عندك
ساعات كتير واحدة تقلب عليكى مواجع كانت سابقة و انتهت
واحدة بتتكلم عن اكتشافها للخيانة
و الموضوع دا حصل معاك من خمس سنين و انتهى خلاص
فبتثير المشاعر تانى كما لو انها حصلت دلوقت
و بتستدعى احزان مالهاش لازمة حاليا
كتاباتك انتى نفسها عن مشاكلك او حتى اشارتك ليها
او تلقيحك بالكلام
و ردود الناس عليكى كتير اوى بتثير مشاعرك اكتر و اكتر على زوجك
دا غير الزوجات الى بتنشر صور سعيدة مع زوجها و تحكى جوزى جاب لى
و جوزى قالى
و جوزى عمل لى
و المخ يشتغل فى المقارنة بشكل لاواعى
هتلاقى نفسك مش طايقاه و بتقولى حسرة على و على بختى
دا غير بأة كمان التشيير و المنشن الى بتعمليه لجوزك و الى ممكن يكون مثير
والا ممكن تلقحى بالكلام الى ممكن يوجعه يثيره
الازواج بيقلبوا مشاكلهم مع زوجاتهم تريقة و سخرية
و دى بتخليهم بشكل لا واعى يتجاهلوا الحلول العملية و يطلعوا غلبهم على شكل كوميك و سخرية ودى حاجة مثيرة للزوجات
الازواج كمان بيشيروا لبعض و يبعتوا لبعض صور و فيديوهات بنات
و يشتغل العقل بشكل لا واعى على المقارنة و تلاقيه يقول لنفسه يا بختك الاسود يا محمد
الازواج كمان بيتشحنوا جدا من مشكلات النساء لما بيقروها ازاى ست تفضح جوزها كدة
و ياسلام لو كانت المشكلة فيه
بتوجعه اوى
و بيبقى مرعوب من فضيحة مراته ليه
و ساعات يتخانق كمان معاها بسبب مخاوفه
دى
دا غير كمان المناقشات و الحوارات الى بتخليه يقرف من صنف الستات كله او صنف الرجالة كلهم
و تلاقيه بياخد اى كلام مش عاجبه كما لو انه كلام كل الستات حتى لو مراته
وكلام اى راجل مش عاجبها كما لو انه كلام جوزها الى مش بيقوله
دا غير بأة مشاكل الصداقات و العلاقات و الناس الى بتريح بعض و الخيانات على وسائل التواصل و حدث و لا حرج
دا غير تلقيح الأهل
و تعليقات ممكن تتفهم غلط
و لايكات متراقبة
و شكوك و ظنون متصاعدة
قللوا جرعة السلبية الى بتدخل حياتكم ربنا يصلح حالكم
جربوا بس حالتكم النفسية يوم واحد من غير سوشيال ميديا
جربوا تعدوا مع بعض اليوم دا و تتواصلوا وجها لوجه و قارنوا بين راحتكم النفسية
الشباب بقوا مدمنين العن من المخدرات
و للاسف دى حاجة ببلاش
و مش حرام
و متاحة ليل و نهار
و أثرها مدمر
لكن للاسف محدش بيحس بيها
….

التعليقات مغلقة

إلى الأعلى